Njoumba palava! When ya ngah say you be yee small brother from village

 When you dee stay for town, day fit hardly pass way you no take tako go someplace. When you take tako someday dem,you fit get balock enter taxi way the driver komot yee house wo ‘hungry’. You and yee ko lass get matta before you wan reach place way you dee go. But some day dem Grand Jesus fit butter ya bread you enter taxi way the driver yee woman jos born. All yee skin na sugar and wouna ko tory like old kombie dem. Na ting that way e happen for me some night as a komot Malingo Junction dee go ma place for Muea.

Da driver be start tok na how way e beat some small driver way e cosh yee say yee mami only becos e ask the other one say na how e park so. After the driver start tok with yee passenger way na driver about some da other  friend way e dee follow yee na only woman and mamee dem way dem de rent so that e ko stay with them for njoh. Time way e leave da yee  passenger colleague for Mile 17 e start tell say why e no ko ever sleep for njomba yee house.

                           According to ting way e tell we, time way e be till dee follow e be get some e fine ngah. Some day e carry yee dortee close dem inside bag go da ngah yee has so that the ngah ko wash am. Time way e rich the has, e leave the bag for some corner, climb for bed dee sleep, the ngah komot. As e dee sleep,some person knack door then start dee try for opening with key na yee way e wokop go open am. Then some big grand enter ask yee sigh way the ngah go. Na yee way e say the ngah  dong komot. But as e dee finish tok the ngah land. The grand torn ask the ngah nah say the driver na  who. Na yee way the ngah tok say the driver na yee small brother way e komot village. Taxi driver say time way the ngah tok so yee too e jos compork gree and then the grand frère turn see da yee bag close dem jos confirm say true true taxi driver na the ngah yee small brother from village. The grand frère take the ngah yee and yee go huberge go ‘work work’. Time way dem kam back da grand  frère ask  taxi driver day way e dee back for village then wash yee ten bag say when e rich make e salot raymay dem. After way e ko, driver wise say da grand na da ngah yee titulaire  and na yee dee pay the ngah yee long. Driver say e tie heart so tay morning rich then e beat day ngah like snake, take yee close dem go wash’am den swear em bible say e no ko ever sleep for girlfriend yee loko again. Da driver tell we say no be the fact say the ngah be get oda paddyman be vex yee. Ting way e vex yee na say da ngah call a whole yee say e be yee small broad way e jos komot village.