A dong die! Charlotte Dipanda dong enter nyuoungoh

The other day some ma friend be wan take some music dem for ma machine. As me and yee begin look inside ma music folder, a ask yee wheda e wan Charlotte Dipanda. Na yee way the ngah say well since way all man like Charlotte Dipanda make  a jos gee yee. As a dee send yee dee folder, e make some statement way a no fit member fine. But thing way e tok be mean say the girl trong becos say e day Lions Club - way na njangi for nyoungoh according to yee. For simple pidgin, Charlotte Dipanda only trong becos say e day nyoungoh. Na the first time that way a hear say some Cameroonian star day nyoungoh.

                                                 A no know whether na neck or na idleness but anytime way some person blow peepo dem ko start say na nyoungoh. Dee ting be start na with Rihanna, Jay Z and yee ngah say dem day Illumati. E fit be na true, e fit be na lie but na wheti be njanga yee own inside achu soup? Wo know say mop no get bandary but the bad thing with dee kongossa na say e dee make some pikin dem feel say if you wan blow you mos enter bad njangi. Dee kongossa too dee make some peepo dem feel say u fit sleep for wouna house sotay gas then jos woukop torn star like play. Da wan na fat lie. Make wo jos gree day all dee star dem day nyoungoh. Est-ce que na nyoungoh dee make dem sing fine? Est-ce que na nyoungoh dee gee dem power for stand sing and saka sotay? Make peepo dem shidong quiet. Prince Afu-Akom be dong tok yee ting say when person dong make'am wishpeepo ko start say na mami water.