Na whetee dem dee teach for ENAM?

The other day as a be dee torn torn me for Molyko a meetop some ma old paddychap for Malingo junction. Me and da ngah be first meetop na for boarding school for B.H.S Mankon. Wo shidong for the same bench for Form 4, be friend sotay men dem start tok say na ma chap. After a komot B.H.S. Mankon go G.H.S Bokwango for high school, wo meetop again na for U.B. for department of law sotay wo graduate. So na really ma paddychap. After U.B. the ngah go ENAM but a go me na ASTI.

  As wo be dee chat, e ask me say na whetee dee again for U.B. wo strike. A no be really know ting way e dee happen for U.B. since a be dong finish for day wit school. So  a tell yee the kongosso way me too  hear for quartier. Na yee way the ngah torn ask me why wo ova like disorder. Say all da strike na disorder, disturbance of public peace. The tok surprise me becos time way wo be day U.B. from 2004 - 2007 e no be ever check say strike na disorder or disturbance of public peace. Na now way e dong go ENAM way e dong start check say strike na disorder, disturbance of public peace. Na yee way a start wonda whetee way e happen for the  ngah since way e go ENAM. Na whetee way dem dee teach dem for ENAM and some day oda school dem way na only concours fit carry you go day? 

   Dee matta no be play play becos a dong wise say when people dem go da school kam back they dee ever change. Before dee ma paddychap wan go ENAM e no be ever check say strike na bad ting. So ma question now whetee dem dee teach peepo dem for school dem like ENAM? Est-ce que dem dee teach dem na about idea dem way dem dong espire or est-ce que dem dee teach dem na about ting dem for now. Becos the idea say strike na bad ting na idea for da time way Ni John be wan launch SDF. No be idea dat for dee today so wit human rights and kind kind freedom dem. If wo gree say for check say strike na bad ting na back back idea then est-ce que they no get for change the kind ting dem way dem dee teach peepo dem for school like ENAM? Becos na dee kind idea dee make some Governor shidong unda AC gee order say make dem kill peepo da pikin dem when dem strike.

  As  a be dong first tok, dee palaver no concern na only ENAM. E concern even police and BIR dem. As a  komot Muyuka someday, some pa inside moto begin tell me how way yee pikin go BIR kam back way e dong change kwata kwata so tay yee mamee and small dem dee fear yee for house. Some person fit tok say da one na deefrend ting and a ko gree small but a ko still ask whetee dem dee teach for ENAM. If na say dem dee teach dem na idea dem for time for Moses then make dem change. Some person be dong tok say if na so so yee, e for jos lock the school sef and a  dee see ting way e be dee try for tok. ENAM na jos some ting way wo photocopy am from French peepo dem. Becos a no check say wo ever shidong ask wheda e fine for wee make wo big peepo komot from normal school with other normal peepo  oh make dem komot from deefrend school wo deefrend idea dem about the way way ting dem dee happen. ENAM no get na only problem wo ting dem way dem dee teach for day. E get problem too wit yee bad name. Peepo dem dee see am like place for go learn tiff torn money man jes noh jes noh. So na whetee dem dee teach for ENAM true true so?